રાજેશ દેથલીયા, અમરેલી: ભારત બંધના એલાનને સફળ બનાવવા માટે અમરેલી શહેરમાં ભાજપ અને કોંગ્રેસના બે દિગ્ગજ નેતાઓ રસ્તા પર ઉતરી આવ્યા હતા, નેતા વિપક્ષ પરેશ ધાનાણી બંધ ને સફળ બનાવવા માટે તો દિલીપ સંઘાણી બજાર ખુલી રાખવા માટે વિનંતી કરતા નજરે પડ્યા હતા. વિપક્ષ નેતા પરેશ ધાનાણીની આગેવાનીમાં કોંગ્રેસ આક્રમક જોવા મળી હતી અને અમરેલી શહેરમાં બંધને મિશ્ર પ્રતિસાદ મળ્યો હતો.
અમરેલી શહેરને ભારત બંધ સાથે જોડવા માટે નેતા વિપક્ષ પરેશ ધાનાણી પોતાનુ સ્કુટર લઈને રસ્તા પર ઉતરી આવ્યા હતા અને દુકાનદારો ને બંધ મા જોડાવા વિનંતી કરતા નજરે પડ્યા હતા. કેટલાક દુકાનદારો પરેશ ધાનાણીની વાત માનીને દુકાનો બંધ પણ કરતા હતા. પરંતુ ત્યારબાદ પોલીસ પહોંચી હતી અને પરેશ ધાનાણીની અટકાયતનો પ્રયાસ કર્યો હતો, પરંતુ પરેશ ધાનાણી પોતાનુ સ્કુટર લઈને છટકી જવા સફળ થયા હતા અને અમરેલી શહેરમાં પરેશ ધાનાણી અને પોલીસ વચ્ચે પકડા પકડી જેવો માહોલ ઉભો થયો હતો. જોકે આખરે પરેશ ધાનાણી અને કેટલાક કોંગી કાર્યકરો ની પોલીસે અટકાયત કરી હતી.
અમરેલી શહેરમાં પરેશ ધાનાણીની અટકાયત બાદ ભાજપના દિગ્ગજ નેતા દિલીપ સંઘાણી પોતાની સાયકલ લઈને શહેરની મુખ્ય બજારમાં નિકળ્યા હતા અને દુકાનદારો ને ધંધા રોજગાર શરૂ રાખવા વિનંતી કરતા નજરે ચડ્યા હતાં.
